Ech hunn eng grouss Schnëss
Eng vill ze grouss Schnëss
Mee wann et wichteg gewierscht wier
Hunn ech se net opgerappt
E Radar dofir hat ech nach ni
Ech si méi de Genre blanne Fësch
Mee ech wosst et nach ëmmer
Wat ech sinn
Wat s du bass
Obwuel mer ’t ni ausgeschwat hunn
Ech wosst et nach ëmmer
Mee ech wosst et net besser
An alles wat mer nach ze soe bleift ass
Et deet mer leed
Et deet mer leed
datt ech net do war
An datt ech näischt gesot hunn
Wéi ech hätt sollten
Wéi ech hätt missen
Well obwuel all Mënsch et besser weess
An et och besser wëll
Wann ech net op d‘ Barrikade ginn
Steet och soss keen op
Ech wosst nach ëmmer
Datt ech net alleng sinn
Mee ech wosst et net besser
War iwwerzeegt datt ech et ignoréire kéint
Ech konnt schliesslech domatt liewen
Ech hat just net un dech geduecht
An datt s du dat net konns
Ech sinn am Feeler
An ech sinn net am Feeler
Ech maache mer d‘ Virwërf
Du muss lo guer net probéiren mer se auszerieden
Ech gesi mech selwer an der Schold
An domatt muss ech einfach léire liewen
Ech sinn am Feeler
Obwuel ech eigentlech net am Feeler sinn
Et war net meng Verantwortung
Well obwuel ech selbstbewosst do stung
Lung ech eigentlech och um Buedem
All Dag sou Saachen ze héiren
Mécht eppes mat der
Ech weess ech hätt missen
Mee obwuel ech et sou wollt
Hunn ech mer all Kéier op d’ Zong gebass
D’ Wierder sinn einfach am Hals stieche bliwwen
Well och wann ech ‘t mer net agestoe wollt
Ech hat Angscht
An alles wat ech ëmmer rëm widderhuele kann ass
Et deet mer leed
Et deet mer leed datt s du dat hues missen héiren
Wat ech hu missen héiren
Ech hat keng Ahnung
Wéi vill méi schlëmm ‘t nach fir dech wier
An et ass mir egal wat dir sot,
Mee är Sprooch ass Gëft
Schwul Sau
Deet scho wéi wann s de lesbësch bass
Mee wéi fillt et sech da réicht u wann s de ‘t bass?
Ech hätt hinne misse soen
Datt si hiert Maul hale sollen
Datt si einfach hiert Maul hale sollen
Et deet mer sou leed
Datt ech dat ni hunn
Ech hätt missen
Well wa mech all déi Joren eppes geléiert hunn
Dann erwaart net datt irgendeen vun ausserhalb hëlleft
Hoff net op de solidareschen Hetero
Dee kënnt net fir eis
Ech hätt missen
Well schliesslech sinn ech d‘ Lesb
A mäi Kräiz ass manner schwéier wéi däint
Ech soen net datt et a menger Plaz einfach ass
Mee et ass net grad sou schlëmm
Ech krut deemols mat enger Kurrel an de Kapp gedréit
Du häss se scho laang dran
An et ass sou onfair
Well d‘ Scholdgefiller zermierbe mech
Obwuel se iech zermierbe missten
Et war net u mir
Och wann ech mir dat déi ganzen Zäit arieden
War et net u mir
Wéi hätt ech da staark si sollen
Wann ech mol mat mir selwer eens ginn hu missen?
Wéi hätt ech da sollten fir anerer antrieden
Wann ech selwer Hëllef gebraucht hätt?
Wéi hätt ech sollte géint Homophobie ugoen
Wann ech selwer Affer war?
An et ass sou onfair
Well et sidd net dir déi lo leid
Et sidd net dir
Déi lo vu Selbsthaass zerfriess sidd
An déi Zeilen voller Scholdgefiller hei néierschreift
Obwuel et dir misst sinn
An alles wat mer ze soe bleift ass
Et deet mer leed
Ech weess dat ass net dat wat s du héire wëlls
Dat ass net dat wat s du héire brauchs
Fir dech ass dat alles keng sou eng grouss Saach
Mee dat ass dat
Wat ech lass gi wëll
Wéi ech héire hunn wat s du ze erzielen haass
Op dem Dag deen ech am Kalenner ënnerstrach hat
Koume keng Tréine méi
Mee just nach d‘ Fro
Wéi konnt ech et sou wäit komme lossen
Ech krut deemols mat der Kurrel an de Kapp gedréit
Du hues se scho laang dran
An deen Owend hunn ech eng Decisioun geholl
Ech war net ëmmer do
An dat deet mer leed
Et deet mer wierklech leed
Mee lo sinn ech do
An ech wäert net méi goen
Ech sinn net méi alleng mat Anescht-Sinn
An du net méi mat denge Gedanken
Mir sinn net méi alleng